ఇవాళ్టిదొక్కటే..!

1
ఎక్కడో పువ్వు పరిమళించడం ఊహించుంటావంతే
ఇంకెక్కడో ఒక మొక్క మొలకెత్తడం చూసుంటావంతే
ఊహలు కూడా కబ్జా కాబడిన 
కులక్షేత్ర పద్మవ్యూహంలో నువ్వో అభిమన్యుడవైనావిపుడు
2
సమభావంలేని సరిహద్దులనుంచి వెలివేయడమే
కారణమయితే నీ కన్నీళ్లతో దారిని తుడుస్తూ తిరిగొచ్చేయాల్సింది 
మధ్యలో ఆగిపోవడమనే చిగురుని ఎవరు మొలకెత్తిస్తున్నారో గమనించకుండా 
తల తిప్పేసుకుని ఉండాల్సింది
అది విషమ్నిండిన ఎరువుతో వేగంగా వృక్షమై నీమీదే కూలబడింది
3
నీ చివరి కన్నీళ్ళ తడిని రుచిచూడలేక
కలం కాగితంపై రక్తం చిందించిన వేడిని అందరూ పులుముకుంటున్నారిపుడు
వెలిసిపోని చీకటి రంగుగా ఆకాశంలో పరుచుకున్నావు
ఇంకెక్కడికీ వెళ్ళకూ...!
4
నేలమీద నడిచిన గుర్తులను చెరిపేయడానికి
గొంతులోంచి పేల్చిన ఆవేశాన్ని హత్య చేయించటానికి
ఒకానొక ఆయుధం నీదాకా రావడం సంఘంపై వేయబడే 
సాధారణ సంతకమంతే
అదొక ముద్రనుకొని పొరబడ్డావు కదా..!
5
ఉరిని సిద్ధం చేసుకునే ముందు
తల్లి పేగుతో పేనుతున్నట్టు మర్చిపోతే 
ఇన్నాళ్ళ నీ శ్వాస ఈ పరిసరాల్లో పరిమళించిన గుర్తులుండవు
వెళ్తూ వెళ్తూ కాస్తంత దుఃఖాన్ని, ఆక్రోశాన్ని
సమతూకంలో ఇచ్చావు చూడూ
అదే నువ్వంటూ వదిలెళ్ళిన శిలాఫలకంగా మొలకెత్తుతోందిపుడు
6
ఇవాళ్టిదొక్కటే చివరిదని నువు రాయగలగడం
గుర్తించనంతవరకూ అంతా తుప్పట్టిన దేహాల్తో తిరుగుతుంటాం

(రోహిత్‌ కోసం)