నీవు

పలచబడిన రాత్రిని నీ కళ్లలో దాస్తాను
రెల్లుగడ్డి పరుచుకున్న చినుకుల్లోంచి పరావర్తనమైనట్టు 
రాత్రిపుడు ఇంద్రధనస్సవుతుంది
చీకటంతా చెక్కపొట్టులా
నేలమొత్తాన్ని కావాల్సినంతమేర ఆక్రమించేస్తుంది
నీలోంచొక వెలుతురు పురుగు
అప్పుడపుడు కొంగరెక్కల్లా తడుముతూ రాత్రిని నిద్రపుచ్చుతుంది
ఏ జాములోనో నీవొక నీలిసముద్రమై 
నలనల్లని రాత్రికి
అమితమైన శృంగారపు సౌఖ్యాన్నిస్తావు
కిటికీ అద్దాలమీద పిచ్చుకల కాలి 
గురుతులు చెరగకుండానే,
ఇంటిపైకప్పుమీద తచ్చాడుతున్న వర్షాన్నీ
ఏ మేఘము ఎత్తుకెళ్ళలేకుండానే,
దుప్పట్లు అలసి నిదురపోయేందుకు 
కాళ్ళదగ్గరే ఆవలిస్తున్నపుడు
సమయాలు గడిచిపోవడం తెలుసుకోలేవు...
కొన్నాళ్ళకు చలికి వణుకుతూ 
నీమాటల ఉదయాల్లోంచి బయటికొస్తాను