ఖడ్గం

ఐదు వేళ్ళు
ముడుచుకున్నపుడు
ఒక పిడికిలి 
ఒక శక్తి
కొన్ని సమూహాలు
కదులుతున్నపుడు
ఒక యుద్ధం
ఒక శక్తి
కొన్ని గుట్టల సమాహారం
పచ్చబడినపుడు
ఒక అడవి
ఒక శక్తి
ఒక భూభాగం
ఉమ్మడిగా జీవించడం
ఒక దేశం
ఒక శక్తి

ఒక దేశం ఆక్రోశం
ఒక దేశం ఆవేశం
ఒక దేశం ఆవేదన
ఈ భావోద్వేగాల స్థానచలనమే
అసహనమై వ్యాపిస్తుంది.

పదాలను, భావోద్వేగాలను
వాటి రాజసంనుంచి
దింపేసందర్భాలను ఎదుర్కొనే
ఒకే ఒక ఖడ్గం తయారవ్వాలి
ఖడ్గం పిడికి అధికారమివ్వాలి
ఎప్పటికపుడు దుర్వినియోగంకాకుండా
ఖడ్గం అంచు
అధికారంవైపే గురిపెట్టాలి