వర్షం - ఓ ఉదయం

కదపనా..
వద్దోద్దు అంటుకుంటుంది

పర్లేదు కదలవోయ్..
లేతవి కాదుగా
సున్నితం అంతే

పదా..!
అలా వెళ్ళి
పరిమళం దుప్పటి కప్పుకుని
వెచ్చగా వచ్చి
తేనీటిలో మునుగుదువూ కాని...

అమ్మో బయటికే..నేను
రాలేను..
ఈ బురదలో
ఈ ఛాండాలపు దారిలో

ఛప్ నోర్ముయ్..
బడుద్ధాయ్...

ఎప్పుడూ
ఈ సాంకేతికపు
సంకేళ్ళు వేసుకునుంటావా..!!?

అలా రా..
చల్లగా స్నానం చేసిన
చెట్లను పరికించూ..
నీ పాదాలను కావలించే మెత్తని
ఆ బురదను తాకు..
ఆ వాసన పీల్చు అమ్మలా ముద్దాడే
ఎంగిలి వాసన..
తూనీగలతో పోటి పడే పిల్ల కాలువలై
నువు కూడా అందులో దూకి
గెంతులేస్తావ్...