నా బాల్యం

నా బాల్యం
పల్లెటూరిలో
గతుకుల దారిలో
బస్సు గొట్టం నుంచి వచ్చే
దట్టమైన పొగ..
ఇంటి వెనక దొడ్లో పేడ అంత
చిక్కని మెత్తదనం..

నా బాల్యం
ముడ్డి కింద చిరిగిన నిక్కరు
అతుకులు..
చొక్కాకు గుండి పోగొట్టుకున్న బాధను
కప్పివేసే పిన్నీసు..

నా బాల్యం
వేప చెట్టుకింద
అరుగుపై
పెద్దమనుషుల చుట్టూ
పరిగెడుతోంది..
ఇంటి బయట ఆడవాళ్ళ
బారాకట్ట ఆటకు
సిద్ధమైంది..

నా బాల్యం
బడిలో తక్కువ మార్కులు వచ్చినందుకు
మేష్టారు చేతిలో బెత్తం..
చేను గట్టుపై పడకుండా పరిగెట్టే
పందెం..

నా బాల్యం
మసక చీకటిలో
చందమామ పక్కన చుక్కలను
లెక్కపెడుతోంది..
అవ్వ చెప్పే కథలకు
ఊ కొడుతోంది..

నా బాల్యం
ఎడ్లబండిపై
హోప్ప...హూప్ప...హో హో
అని ఎద్దులని గద్దిస్తోంది..
చిగురు కోసం చింత చెట్టుపై
కొమ్మకు వ్రేలాడుతోంది..

బాల్యం ఎప్పుడు
అందమైనదే
దర్జాగా, స్వతంత్రంగా,
ధీమాగా
ఉంటుంది నా బాల్యం..

నా బాల్యం
రాత్రి
ఒంటరిగా బయటికి వెళ్ళలేని
పసితనం..
అమ్మ పక్కనే కొంగు కప్పుకుంటుంది
నా బాల్యం..