ఇది నిజం

ఇది నిజం
నేనున్న చోటే ఆలోచనల భూకంపం
సమాజం విడివిడిగా ఛిద్రం అయిపోయింది...

ఇది నిజం
మనసుకి మెదడుకి అంతరం అఘాతంలా అంధకారంగా
కంటికి కాలి కొనకి ఉన్నంత దూరం...

ఇది నిజం
నువ్వు నేను మనం కాలేమిప్పుడు
మొహమాటానికి స్నేహంగా నీవు
మూర్ఖత్వానికి ప్రాణంగా నేను
ఇక ఎప్పటికి ఒక్కటికాలేం..శిథిలాలై మిగలాల్సిందే

ఇళ్ళ చుట్టూ అపార్థపు గోడలు మొలిచాయెప్పుడో..

ఇది నిజం
బయటికెళ్తే రుధిర వర్షం ఏరులై పారుతూ
బయటికెళ్తే తనున్నట్టు గుర్తించమని రోధిస్తూ
బయటికెళ్తే మసిపూసుకుని పసివయసు మాకేదారి లేదని ప్రశ్నిస్తూ

సమాజం కాలుతున్నది వెలుగు కోసమా..మిగిలే చీకటి కోసమా...
చరిత్రను చూడకుండా భవిష్యత్తును ఊహించడం సాధ్యమా...!

ఇది నిజం
నేటి జననాన్ని నరికేస్తూ రేపటి తరాన్ని బతికించడమెలా...?
కనురెప్ప మూయకుండా కలలను పొందడమెలా...?