లోపలి స్వరం 3

ఈ సారి ఓ కొత్త ప్రదేశం ఊహించాలి

నేలలోకి తలను పూడ్చేశాక
చేతులు కాళ్లు మొలకెత్తాలి నిటారుగా
ప్రక్క ప్రక్కనే కొత్త శరీరాలు
శవాలుకాని దేహాలు కొమ్మలు చిగురించుకుంటూ
అనుభవ పరిమళం జల్లుకుంటూ పెద్ద శరీరాలు మాత్రమే
పిల్లలందరూ పూలుగా
ప్రకృతులు ప్రేమలుగా పచ్చగా విస్తరించనీ
అందరూ కలిసి మానవత్వ పుప్పోడులను రాల్చుకుందాం

మనిషితనం పారాలి మధ్య మధ్యలో
సమానవత్వం మిగలాలి పంచుకోటానికి

ఆకాశంలోకి కాళ్లను ముంచాకా
ముఖము మొండెము జారిపోనీ మట్టిలా మారటానికి
చుట్టూ ఇంకొన్ని కాళ్లు మునుగుతుండాలి ముసురుకున్న మబ్బుల్లా పెద్దవి
చిన్న కాళ్లు తారలైతే చాలు
లేత లేత కాళ్ళు ఇంద్రధనస్సులా మనల్ని నింపుకుంటాయంతే
అందరూ కలిసి చినుకుల్లా వర్షిద్దాం

మనిషితనం భ్రమణం చేయాలి మన చుట్టూరా
సమానవత్వం మిగలాలి మన మధ్యలో

అందుకే ఓ కొత్త ప్రదేశం కావాలిప్పుడు