వివర్ణం

గుంపులన్ని ఒక్కటిగా కదిలి కదిలి
గళమెత్తటానికి
ఆత్మహత్యలన్ని ఒకే తాడుకి ఉరేసుకోడానికి
చదువులన్ని మెదడు స్థాయిని మించే
బరువులన్నిటికి
స్థావిరమైన దేహాలన్ని ఒకే అరలో నింపే
అనుభవానికి
అన్నిటికి ఒకే చోట ముడేసే
సమాజానికి
నువ్వు నేను రెండు రంగులు కాకుండా
ఒకే రంగు కింద కప్పబడదాం

ఆలోచనలన్ని సాధనలో రానప్పుడు మూటకట్టి
మూలన పడేద్దాం
అడుగులన్ని ఒకేబాటలో నడవనప్పుడు కాళ్లన్ని
నరికేద్దాం
శ్రమలన్ని చెమటలుగా జీవితంలో చచ్చిపోనివ్వు
నువ్వు నేను రెండు రంగులు కాకుండా
ఒకే రంగు కింద కప్పబడదాం

మాటల్లో విషం చూకలు చుక్కలుగా
చూపుల్లో ద్వేషం కొంచెం కొంచెంగా
చుట్టూరా చేతులన్ని ఉరితాళ్ళై చిదిమేసినట్లు
భయాన్నో బంధాన్నో నింపేసుకుని
అందరిలా మనం చావటమెందుకు నిశ్శబ్దంగా
అందరిలో క్రూరంగా చంపబడదాం నిరాకారంగా

నువ్వు నేను రెండు రకాలుగా కాకుండా
ఒకే రూపంగా చచ్చిపోదాం