మనిషి

నేను చెప్పదల్చుకున్నది స్తబ్దంగానున్న
ఒక గుంపుని కాకపోవచ్చు
వ్యక్తిత్వమో
అవ్యక్తమో
మనిషిలోని ఇంకో మనిషి సంగతో గుర్తొస్తుంది

కట్టే విరిగి పెలుసు ఎగిరినంత స్వేచ్ఛగా
సమస్యల్ని
విషాదాల్ని
వెనక్కో ముందుకో తోసే ప్రయత్నాల గురించో...

ఎన్ని భ్రమలున్నా
గాయాలు గెలిచి రక్తం ఎర్రగా ఏడ్వడాన్ని
సమస్యలు చిట్లి కన్నీరొలికేదాన్ని గురించో...

చెప్పాలనుకుంటే
ఆనందంలో వణికే మనసు గురించో
భయంలో బెదిరే శరీరం గురించో
చెప్పడానికి మాటలన్ని మూటలా దూకేయవచ్చు...

అన్నట్టు దూకడం గురించైతే
మనిషి మనిషిలోకి దూకాలి
ఆకాశంలా మారి మబ్బులా చర్మం కప్పుకుని
నిశ్శబ్దంగానో
శూన్యంగానో
హరివిల్లులా పెదవుల్ని విప్పార్చి
నీలంగా నవ్వడమొకటే చేయమంటాను

ఏదైతేనేం
మనిషి మనిషిలోకి ఎగరాలంటాను....