ఇప్పటికిపుడు

ఇప్పటికిపుడు ఊహించాల్సొస్తే
గుండ్రంగా కాకుండా పైకి కిందకి ఊగే భూమిని
పచ్చని ప్రకృతి నీలంగా నడిచే దృశ్యాన్ని
మృదువుగా వెన్నెలజల్లే సూర్యుడిని
భగభగమండే చంద్రుడిని
పెద్దవాళ్ళంతా ఆకాశాల్లా మారి విస్తరించడాన్ని
మేఘాలన్ని పిల్లల్లా నవ్వులు వర్షించడాన్ని
వీటన్నిటిని
శూన్యం ఒడిలో ఊయలూపి
ప్రాణవాయువు జోలపాడే ఆడవాళ్లనూహిస్తాను

ఊహించడానికి అడ్డుగోడలేముంటాయి
రక్తం నదిలా పారడాన్ని
శరీరంలో నది పాయలుపాయలుగా ఈదడాన్ని
ఆకాశాన్ని కత్తిరించి భూమికి చొక్కా కుట్టడాన్ని
మీ అనుమతి లేకుండా మిమ్మల్నందర్నీ
పక్షుల్ని చేసి
నేనో పేద్ద వేటగాడినవడాన్నూహిస్తాను...

నాపై పిడిగుద్దుల్లా కురుస్తారేమో
నన్నేమైనా చేయగల భీకర శక్తులుంటాయి మీకు
చేతుల్ని వెనక్కి విరిచి
కాళ్లను కొలిమిలో కాల్చేస్తారని తెలుసు
తలను నుజ్జు నుజ్జు చేయండి
నేనూహించడం మాత్రం ఆపలేరు

అందుకే కాబోలు
మనిషితనం నిండిన మనిషిని ఊహించడం సాధ్యపడడంలేదు నాకు...!

ఇప్పటికిపుడు ఊహించాల్సొస్తే
విశ్వమంతా నిశ్శబ్దావరణాన్నూహిస్తాను...