సంఘర్షణలు

సంఘర్షణలంటే
సంఘటనల చివరల వేలాడుతుంటుంది

నిశ్శబ్ద వాతవరణాల గందరగోళంలో
గాఢమైన చీకటిలో
సంచరిస్తున్న భయం నుంచి
గదిలో ఒంటరి ఆలోచనలనుంచి ఉద్భవస్తుంది...

లోపలి వైపు ఎక్కడో ఒప్పుకోలేని భావాలనుంచి రావచ్చేమో
ఓర్పు గుర్తుపట్టలేనంతగా నశించాక
సమూహాల్లో సంచరిస్తుందని తెలుసుండాలి
ఒక్కోవ్యక్తిఆవేశంపై నుంచి ఎగురుతుండటం చూసుండాలి

రాత్రి చనిపోయాక ఉదయాలన్నిటికి ఆరోజంతా సంఘర్షణే
కాలానికి వర్తమానానికి సాక్షిగా మనిషుండటం సంఘర్షణే
అలాంటపుడు
జీవితం మొత్తం సంఘర్షణల మూటేనేమో
బాధలు
దు:ఖాల తేలికలు బయటకు దూకితే సంఘర్షణ చనిపోయిందనుకుంటాం...

ఒక వైపునుంచో
ఒక నిస్సత్తువలోనో
అసహనాల కుప్పలమీదో
భారంగా కృంగదీసే సమయాల లక్ష్యంగానో
ఇంకోసారి మొదలవ్వదనీ మాటివ్వలేం కదా..
మాటలు కూడా
అటు ఇటుగా పడున్న అక్షరాల ఏకాంత సంఘర్షణలోంచే పుడతాయని కనిపెట్టాలి