అస్తవ్యస్తం

మార్చడానికో
మభ్యపెట్టడానికో రాయదల్చుకోలేదుగానీ
వాహనాల కిందపడి 
పత్రికల్లో ఎక్కే శవాలను
లెక్కపెట్టడానికే ఉదయాలన్ని ఖర్చవుతుంటాయి
ఉత్సాహంగా జీవితాన్ని
హత్య చేసే శిరస్సులు
కొన్ని రహదారులపై రక్తమోడుతుంటాయి

కూలిన గోడల మధ్య
అరుస్తున్న దేహాల కేకలు ప్రసరించే
వాహకం వెతుక్కోవటానికి
మార్గాలను అన్వేషించడం జరగాలి
ఉష్ణోగ్రతలకు ఖర్చుచేస్తున్న అలసటల
భారాలు మోస్తూ
ఆకలి ఆత్మహత్య చేసుకుందనీ
కాసిన్ని నీళ్లని సాక్ష్యంగా ప్రవేశపెట్టాలి....
లుప్తమైన సగందేహాలు
ధీమాగా అందరిని వెక్కిరించడం
గమనించినా అహంకారంతో కప్పేసుకోవడం తెలియాలి...

ఏదీ పట్టించుకోకుండా మూర్ఖంగా చావడమే
జీవితాలన్ని,
ఆశలు అన్నిసార్లూ బ్రతికించవనీ
సమాధానపడటమో
ఆవేదనలు అమితమైనా శేషాన్ని వదిలివెళ్తాయని
దాచుకోవడమో మిగులుతుంది...