సాధారణమైనదొక

కాగితాల కొద్దీ నింపుకునే సంగతులెందుకు !
వేలి కొసన జారిపడే
నీటిబొట్టు అరిచే అరుపు సంగతో
మెలకువల్లో ఊపిరాడక మరణించే
కలల చివరిలేఖ సంగతో
ఇంటి వసారాలో సేద తీరిన వర్షం సంగతో
చెప్పుకోడానికి ఎన్ని కాగితాలని పోగేస్తావ్

పోగేసి పోగేసి సేనానివవ్వగలుగుతావు
చెప్పుకుని చెప్పుకుని మనిషివి అవగలుగుతావు
ఏం చేసినా
ఇంకో మనిషిని పోగేసుకోవాలని
ఇంకో మనిషితో చెప్పుకోవాలనేది
ఆఖరి శాసనంగా మిగిపోతేనే
సంగతులన్నిటిని అక్కడక్కడా దాచేసుకుంటావ్

గడిచిన కొన్నాళ్ళకు
జీవితం నీముందుకొచ్చి సాగిలపడుతుంది
అప్రయత్నంగా చూసి
స్పృశించడమొక్కటే మిగిలుంటుంది
అలసిపోయి బీడువారిన శరీరమిక్కడే
లేవలేని నిస్సహాయ క్షణంలో
కన్నీళ్లలో కొట్టుకుపోయాక ఒక మాట
జారిపోతుంది నీనుంచి

ఎన్ని చెప్పుకున్నా ఎన్నిటిని పోగేసినా
మనిషి మనలోకి వచ్చిన
సాధారణమైనదొక సంగతి మర్చిపోకూడదనీ !!