సీతాకోకచిలుక

వొక ఉదయాన్ని నువ్వూ నేను తెరుస్తాం
సీతాకోకచిలుక, రంగుల్ని నీ బుగ్గలమీద వొదిలి
ఖాళీరెక్కల్తో పారిపోతుంది...!

గదిమూలలో చినుకులింకా బతికేవున్నాయి
మేఘం లేకపోయినా...
బహుశా,
నీ హృదయం ఇక్కడే ఉన్నట్టు
తెలిసిందా వీటికీ...!

తలుపు దగ్గరే రాత్రి వేచివుంది
ఆకాశాన్నొదిలి...
నేనేమీ సాయపడలేను
తలుపు తీయాలంటే నీ నీలిసముద్రపు
కళ్లు తెరుచుకోవాలిగా...!

ఒకానొక పొద్దుటిపూట
మంచు మీగడలా నేలపై పరుచుకునే వేళ
నీ పెదాలమీంచి
సీతాకోకచిలుక రంగుల్తో ఎగిరిపోతాను...!!

(Published in Sakshi Daily on 07-12-2015)