మందారవృక్షం

వొక మెలకువకు నువ్వు నేనూ సాక్ష్యం
నీ ప్రియమైన చేతులకు దొరకని నా నవ్వుని నీకందిస్తాను
నా అమితమైన పలకరింపుల భారాన్ని నీలోంచి నాలోకి ఒంపేయ్
మళ్ళీ ఇటువైపుగా రావేమోననే సందేహాలుండవు
ఎదురుపడటమేగా ఇద్దరికీ నచ్చిన పని
ఇద్దరి కళ్ల వాగులోకి కాసిన్ని వెలుగు పడవలను వదిలేద్దాం
మాటలన్నిటిని రాలిపడుతున్న పూల భారాన్ని మోసే నిశ్శబ్దంలోకి తర్జుమా చేద్దాం
మూల మలుపుల ఒంటరితనాన్ని నీ నడకతో నా చూపూలతో నింపేద్దాం
నువ్వొక మందారమై పరిమళిస్తుంటావు
నేనొక వృక్షమై శ్వాసిస్తాను
అక్కడినుంచి కదిలొచ్చాక ఖాళీ గదికి భారమవుతాను
నువ్వూ ఏ మొక్కకో దిగులకన్నీళ్ళ తడిదనాన్ని ఇచ్చేస్తుంటావనీ
నా మీదుగా వెళ్ళిన పక్షిరెక్కకు వేలాడదీస్తూ నా ప్రేమలేఖ తగిలిస్తాను
లోకం గుడ్డిదవుతున్న వేళ
నీ వెన్నెల నా పౌర్ణమి కలిపి రేయిని వెతుకుదాం
రెండు నిశ్శబ్ద ప్రపంచాలకు,
మన రెండు నవ్వులకు,
నువ్వు నేను వారధి