నీటిచేతుల్తో

1
ఏ నీటి చేతుల్తోనైనా
ఓ మొక్కను పొదుముకోగలిగితే 
ప్రాణం దిగ్గున లేచి నృత్యం చేయడం చూడగలవు

2
ఏ నీటి చేతుల్తోనైనా
ఓ పిట్టను తడమగలిగితే
కొమ్మల్లో దాచుంచిన దానిస్వరం వినగలవు

3
ఏ నీటి చేతుల్తోనైనా
ఓ చెట్టును దాచగలిగితే
నదీనదాలు నీలో ప్రవహించడం తెలుసుకోగలవు

4
ఏ చెట్టునైనా నీలోపల్లోపల మొలకెత్తనిచ్చావంటే
చెట్టంత మనిషవ్వగలవు

5
ఓ చెట్టును పెరట్లోనో
ఒంటరిగా పడున్న ఏ దారిపక్కనో
పొనీ,
ఏమీ తోచక కూర్చున్న ఏ మట్టి గుండెకిందనైనా
వదిలేసి చూడు
నీదాకా పాదులు తీసుకుంటూ వచ్చి గుండెనిండుగా శ్వాసను నింపుతుంది

6
చెట్టు కంటేమించిన మనిషి లేనేలేడేమో
చెట్టంత మనిషి మరో చెట్టే అవగలదిపుడు
మనిషిని పూడ్చేసి చెట్టుని ఇంట్లో సేదతీరనివ్వాలి