హత్యారణ్యం

వేట, తిరగేసిన చరిత్ర సిద్ధాంతమిపుడు
వేటముగిసి శవాన్ని తూకంవేసి
నీవాళ్ళకే అమ్మడం వర్తమాన శాసనం
అమ్ముడుపోవడం, నీవాళ్ళని అమ్మేయడమొకటే
నీకున్న అవకాశం
నాగరిక అరణ్యంలోని కూడలిలో
శవమొకటి నడివీధిలో..
నీ శవమో
నీలాంటి ఇంకో మనిషి శవమో
ఎవరిదైతేనేంటి శవాన్ని అమ్మేవాడిని ఉరితీయక
నువ్వు అక్కడే బేరమాడతావు
అమ్మేవాడు మనిషే
కొన్న నువ్వూ మనిషివే
కూడలిలో విరగబడి చప్పట్లు కొట్టే వారంతా మనుషులే
అరచేయి నొప్పెట్టేలా పిడికిలి బిగించిన వారూ మనుషులే
మనిషి శవాన్ని మనిషే వెలకట్టే సమాజం
ఎంతటి విలువైనది ?
ప్రశ్ననొకదాన్ని సమూహమ్మీదనుంచి
ఓ పావురం ఎగరేసుకుపోతుంది
రెక్కలు తెగిన పక్షివై అందరిమధ్య కదుల్తున్నట్టుగానో
చెదపట్టిన దేహంతో పొడిపొడిగా రాలినట్టుగానో
శూన్యంలో శ్వాసలేని నిశ్శబ్దంలానో
సమాజంలో ఒట్టిగా గడిపేయ్
ఇంకొన్నాళ్ళు వేచి చూడు అలాగే
నువు చావడానికి ముందో
లేదూ నిన్ను చంపడానికి ముందో
నీకింత అని ధర వేలాడదీయబడుతుంది
నీ ప్రాణాన్ని తూకంవేసుకునే అత్యంత సుఖమైన
జీవితాన్ని పొందే ఘనత దక్కుతుంది